నారా రోహిత్ మేకోవర్ అదిరింది..

పోస్టర్ చూసినవెంటనే అసలు ఎవరీ హీరో అనుకున్నారు. కొందరేమో కొత్త హీరో అనుకున్నారు కూడా. కానీ ఈ పోస్టర్ లో మనం చూస్తున్నది హీరో నారా రోహిత్. మొన్నటివరకు కథల ఎంపికలో సంథింగ్ స్పెషల్ అనిపించుకున్న ఈ హీరో, ఇప్పుడు మేకోవర్స్ లోకి కూడా దిగాడు. ప్రస్తుతం నారా రోహిత్.. కథలో రాజకుమారి అనే సినిమా చేస్తున్న సంగతి తెలిసిందే. గుట్టుచప్పుడు కాకుండా ఈ సినిమా షూటింగ్ జరుగుతోంది. నిన్ననే ఈ సినిమా టైటిల్ విడుదల చేశారు. ఇప్పుడా టైటిల్ కు కొనసాగింపుగా నారా రోహిత్ స్టిల్ తో పోస్టర్ రిలీజ్ చేశాారు. పోస్టర్ చూసి అంతా షాక్.

నారా రోహిత్ ఇప్పటివరకు కనిపించని కొత్త గెటప్ ఇది. గుబురు గడ్డం, పెద్దపెద్ద మీసాలు, చేతిలో కత్తి, నోట్లో సిగరెట్, గళ్ల లుంగీ… నిజంగా ఇతడు నారా రోహితేనా అనిపించేలా ఉంది ఈ ఫస్ట్ లుక్ పోస్టర్. ఈ ఒక్క లుక్ తో సినిమాపై అంచనాల్ని బీభత్సంగా పెంచేశాడు నారా రోహిత్. మహేష్ సూరపునేని డైరక్ట్ చేస్తున్న ఈ సినిమాకు నిర్మాత కూడా నారా రోహితే కావడం విశేషం. గతంలో ఈ హీరో అప్పట్లో ఒకడుండేవాడు అనే సినిమాను నిర్మించాడు. ఆ సినిమా టైపులోనే కథలో రాజకుమారి అనే ఈ సినిమా కూడా సైలెంట్ హిట్ అవుతుందనే కాన్ఫిడెన్స్ తో ఉంది యూనిట్.