టాలీవుడ్ లో ఇంటరెస్టింగ్ టైటిల్స్

ఫిలిం చాంబర్ లో సరికొత్త టైటిల్స్ రిజిస్టర్ అయ్యాయి. వీటిలో కొన్ని ఇంకా ప్రీ-ప్రొడక్షన్స్ స్టేజ్ లో ఉంటే, మరికొన్ని కాల్షీట్ల కోసం వెయిటింగ్ లిస్టులో ఉన్నాయి. ప్రస్తుతం  టాలీవుడ్ లో ఇంటరెస్టింగ్ బజ్ ని క్రియేట్ చేస్తున్న టైటిల్స్ ఇవే…

సంపూర్ణ రామాయణం : గీతా ఆర్ట్స్ బ్యానర్ పై రీసెంట్ గా అనౌన్స్ అయిన సినిమా. బాహుబలి రేంజ్ లో హై ఎండ్ బడ్జెట్ తో తెరకెక్కనున్న ఈ సినిమా డైరెక్టర్, లీడ్ కాస్ట్ లాంటి వివరాలు ఇంకా బయటికి రాలేదు కానీ, నిన్నమొన్నటి వరకు సోషల్ మీడియాలో ఈ సినిమాకి రామ్ చరణే రైట్ చాయిస్ లాంటి కథనాలు బాగానే చక్కర్లు కొట్టాయి. ఈ సినిమాకు సంబంధించి సంపూర్ణ రామాయణం అనే టైటిల్ ను రిజిస్టర్ చేసింది గీతా ఆర్ట్స్. దాదాపు 500 కోట్ల రూపాయల బడ్జెట్ తో రాబోతోంది సంపూర్ణ రామాయణం.

సహోదరా : ఫిలిం ఛాంబర్ లో ఈ టైటిల్ ని రిజిస్టర్ చేయించింది వారాహి బ్యానర్. కుదిరితే రాజమౌళితో చేయబోయే సినిమా కోసం ఈ టైటిల్ ను ఉపయోగించాలని ఆ సంస్థ భావిస్తోందట. వారాహి అధినేత సాయికొర్రపాటితో సినిమా చేయడం తనకు ఎంతో ఇష్టమని రాజమౌళి ఇప్పటికే ఎనౌన్స్ చేసిన విషయం తెలిసిందే.

సీతారామ కళ్యాణం : గతంలో నాగచైతన్యతో ప్రేమమ్ లాంటి హిట్ సినిమాని నిర్మించిన సితార ఎంటర్ టైన్ మెంట్స్ బ్యానర్ పై ఈ టైటిల్ రిజిస్టర్ అయింది. ప్రస్తుతం కొంతమంది యంగ్ హీరోస్ తో  ఈ బ్యానర్ చర్చలు జరుపుతోంది. ఏ హీరోకు ఈ టైటిల్ ఫిక్స్ అవుతుందో చూడాలి.

భళి భళి భళి భళి రా భళి : ఏదైనా పాట సూపర్ హిట్టయిందంటే అది సినిమా టైటిల్ గా మారాల్సిందే. బాహుబలి 2 లోని సూపర్ హిట్ సాంగ్ ‘భళి భళి భళి భళి రా భళి’ టైటిల్ కూడా ఫిలింఛాంబర్ లో రిజిస్టర్ అయింది.

శ్రీనివాస కళ్యాణం : బ్యాక్ టు బ్యాక్ సినిమాలను నిర్మిస్తూ బిజీ బిజీగా ఉన్న బ్రాండెడ్ ప్రొడ్యూసర్ దిల్ రాజు రిజిస్టర్ చేసిన టైటిల్ ఇది. శ్రీనివాస కళ్యాణం – శ్రీ వెడ్స్ నివాస్ దాని ట్యాగ్ లైన్. గతంలో ‘శతమానం భవతి’ లాంటి సూపర్ హిట్ సినిమాకి దర్శకత్వం వహించిన ‘సతీష్ వేగేశ్న’ ఈ సినిమాకి డైరెక్టర్. ఈ సినిమాకి ఇంకా హీరో ఫిక్స్ కాలేదు. ప్రస్తుతం ప్రీ ప్రొడక్షన్ స్టేజ్ లో ఉన్న ఈ సినిమా అప్పుడే టాలీవుడ్ లో ఇంటరెస్టింగ్ బజ్ ని క్రియేట్ చేస్తుంది.

శివ సన్నాఫ్ సీతాలక్ష్మి : ఎగ్జాక్ట్ గా ఎవరి కోసం రెడీ అయిన సబ్జెక్టో ఇంకా బయటికి రాలేదు కానీ, లక్ష్మీ నరసింహ ఎంటర్ టైన్ మెంట్స్ బ్యానర్ పై ఈ టైటిల్ రిజిస్టర్ అయింది. కాస్త డెప్త్ కి వెళ్తే ప్రస్తుతం స్క్రిప్ట్ వర్క్ చేసుకుంటున్న సినిమా యూనిట్, రేపో మాపో ఇంటరెస్టింగ్ అప్ డేట్స్ తో అఫీషియల్ అనౌన్స్ మెంట్ చేసే చాన్సెస్ కనిపిస్తున్నాయి.