వెంకటేష్ విక్టరీకి 15 ఏళ్లు

విక్టరీ అంటే వెంకీ.. వెంకీ అంటే విక్టరీ.. ఒకప్పుడు వెంకటేష్ సినిమా చేస్తే సూపర్ హిట్. అలాంటి టైమ్ లో వచ్చిన సినిమా వసంతం. ఏమాత్రం ఆలస్యం లేకుండా విడుదలైన మొదటి రోజు నుంచే సూపర్ హిట్ టాక్ తెచ్చుకుంది ఈ సినిమా. 2003లో సరిగ్గా ఇదే రోజు (జులై 11)న విడుదలై 15 ఏళ్లు పూర్తిచేసుకుంది వసంతం.

కథ, స్క్రీన్ ప్లే, దర్శకత్వం.. ఇలా అన్నీ తానై విక్రమన్ తెరకెక్కించిన ఈ సినిమా 2003లో బిగ్గెస్ట్ హిట్ గా నిలిచింది. ఆ ఏడాది దాదాపు 167 సినిమాలు విడుదలైతే.. అన్నింటిలో వసూళ్ల పరంగా, సక్సెస్ పరంగా వసంతం సినిమానే నంబర్ వన్.

తెలుగు-తమిళ భాషల్లో సైమల్టేనియస్ గా తెరకెక్కి, ఒకే రోజు విడుదలైంది ఈ సినిమా. తమిళ వెర్షన్ లో మాధవన్ హీరోగా నటించాడు. అక్కడ కూడా ఈ సినిమా పెద్ద హిట్ అయింది. రెండు వెర్షన్లకు ఎస్ఏ రాజ్ కుమార్ సంగీతం అందించగా.. తెలుగు-తమిళ్ లో వసంతం పాటలు మారుమోగిపోయాయి. ఇప్పటికీ ఈ పాటలకు అభిమానులున్నారు.

ప్రముఖ క్రికెటర్ వీవీఎస్ లక్ష్మణ్ ఈ సినిమాలో అతిథి పాత్రలో కనిపిస్తాడు. వెంకీ తనకు బెస్ట్ ఫ్రెండ్ కాబట్టి లక్ష్మణ్ ఇందులో నటించాడు. ఏపీలో ఈ సినిమా 139 సెంటర్లలో 50 రోజులాడింది. ఏకంగా 71 సెంటర్లలో వంద రోజులాడింది. బి, సి సెంటర్లలో ఇది పెద్ద బ్లాక్ బస్టర్. అంతేకాదు.. ఈ సినిమాకు 2 నంది అవార్డులు కూడా వచ్చాయి.