సీక్వెల్స్ 2017

సీక్వెల్స్ కల్చర్ సౌత్ లోనూ ఊపందుకుంది. ఒకప్పుడు బాలీవుడ్ కే పరిమితమైన ఈ ఫార్ములా టాలీవుడ్, కోలీవుడ్ లో కూడా హల్ చల్ చేస్తోంది. అలా ఈ ఏడాది ఏకంగా 6 సీక్వెల్స్ ఆడియన్స్ ను ఎట్రాక్ట్ చేస్తున్నాయి.

సూర్య కెరీర్ లోనే మోస్ట్ సక్సెస్ ఫుల్ సిరీస్ సింగం. ఏ ముహూర్తాన సింగం స్టార్ట్ చేశాడో కానీ, అప్పట్నుంచి తీస్తున్న ప్రతి పార్ట్ హిట్ అవుతోంది. ఇప్పుడు ముచ్చటగా మూడో పార్ట్ తో రెడీ అయిపోయాడు సూర్య. తమిళ్ లో సింగం-3, తెలుగులో యముడు-3 పేరుతో ఇది రేపు విడుదలకానుంది. ఇది సక్సెస్ అయితే కచ్చితంగా సింగం-4 కూడా ఉంటుందంటున్నారు మేకర్స్.

ఇండియాలోనే అత్యంత భారీ బడ్జెట్ తో తెరకెక్కుతున్న చిత్రం 2.0. ఈ సినిమా కూడా సీక్వెలే. గతంలో రజనీకాంత్-శంకర్ కాంబినేషన్ లో వచ్చిన రోబో సినిమాకు సీక్వెల్ ఇది. రజనీకాంత్-ఎమీజాాక్సన్ హీరోహీరోయిన్లుగా నటిస్తున్న ఈ సినిమాలో బాలీవుడ్ స్టార్ అక్షయ్ కుమార్ విలన్ గా కనిపించనున్నాడు. రెహ్మాన్ మ్యూజిక్ అందిస్తున్న ఈ సినిమాను దీపావళి కానుకగా విడుదల చేయబోతున్నారు.

ఇక మోస్ట్ ఎవెయిటింగ్ మూవీ బాహుబలి-2 కూడా సీక్వెలే. రాజమౌళి డైరక్ట్ చేస్తున్న ఈ భాారీ బడ్జెట్ చిత్రం ఏప్రిల్ 28న ప్రపంచవ్యాప్తంగా విడుదలకానుంది. ప్రస్తుతం ఇండియాలో అందరి దృష్టి ఈ సీక్వెల్ పైనే ఉందంటే, బాహుబలి పార్ట్-1 ఏ రేంజ్ లో హిట్ అయిందో అర్థం చేసుకోవచ్చు.

ఈ నెలలోనే సెట్స్ పైకి రాబోతోంది మరో సీక్వెల్ రాజుగారి గది-2. చిన్న సినిమాగా వచ్చి పెద్ద విజయం సాధించిన రాజుగారి గది సినిమాకు సీక్వెల్ గా పార్ట్-2 రాబోతోంది. మొదటి భాగంలో స్టార్ డమ్ లేదు. కానీ సీక్వెల్ లో మాత్రం కింగ్ నాగార్జున ఉన్నాడు. నాగ్ కాబోయే కోడలు సమంత కూడా ఉంది. అందుకే రాజుగారి గది-2 ఇప్పుడు టాలీవుడ్ హాట్ టాపిక్ గా మారింది.

తెలుగు-తమిళ భాషల్లో హిట్ అయిన వీఐపీ-2 కూడా ప్రస్తుతం షూటింగ్ మోడ్ లో ఉంది. ధనుష్-అమలా పాల్ హీరోహీరోయిన్లుగా నటించిన వీఐపీ సూపర్ హిట్ అయింది. రఘువరన్ బీటెక్ పేరిట తెలుగులోకి కూడా డబ్ అయిన ఈ సినిమా ఇక్కడ కూడా సక్సెస్ అయింది. అందుకే ఇప్పుడు రఘువరన్ బీటెక్ పార్ట్-2 తెరకెక్కుతోంది.

ఈ సీక్వెల్స్ తో పాటు… 2017లో కనువిందు చేయబోతున్న మరో సీక్వెల్ సామి-2. విక్రమ్ హీరోగా గతంలో వచ్చిన సామి సినిమా ఘనవిజయం సాధించింది. ఇదే సినిమాలో తెలుగులో బాలకృష్ణ హీరోగా లక్ష్మీనరసింహ పేరుతో రీమేక్ కూడా అయి, ఇక్కడ కూడా ఘనవిజయం సాధించింది. ఇప్పుడీ మూవీకి సీక్వెల్ సిద్ధమౌతోంది.

మరికొన్ని చిన్న సినిమాలు కూడా సీక్వెల్స్ గా వస్తున్నాయి. లాస్ట్ ఇయర్ వచ్చిన అడల్ట్ క్రైమ్ కామెడీ మూవీ గుంటూరు టాకీస్ కు సీక్వెల్ వస్తోంది. ప్రవీణ్ సత్తార్ డైరక్ట్ చేసిన ఈ సినిమా తొలి భాగంలో రష్మి అందాలు ఆరబోస్తే… సీక్వెల్ కోసం ఏకంగా సన్నీ లియోన్ నే లైన్లో పెట్టారు.

సీక్వెల్ గా వస్తున్న మరో చిన్న సినిమా సన్నాఫ్ లేడీస్ టైలర్. సరిగ్గా పాతికేేళ్ల కిందట వచ్చిన లేడీస్ టైలర్ సీక్వెల్ కు సీక్వెల్ గా ఈ మూవీని తీయబోతున్నాడు దర్శకుడు వంశీ. గతంలో ఈ సీక్వెల్ కోసం రవితేజ నుంచి రాజ్ తరుణ్ వరకు ఎంతోమంది హీరోల్ని అనుకున్నారు. పైనల్ గా ఈ సీక్వెల్ లో నటించే అవకాశం సుమంత్ అశ్విన్ కు దక్కింది.