మళ్లీ సినిమాల్లోకి రీఎంట్రీ ఇచ్చిన పవన్

అభిమానుల కల నెరవేరింది. పవన్ మరోసారి ముఖానికి రంగేసుకున్నారు. కెమెరా ముందుకొచ్చారు. అవును.. ఈరోజు పవర్ స్టార్ పవన్ కల్యాణ్ రీఎంట్రీ షురూ అయింది. పింక్ తెలుగు రీమేక్ రెగ్యులర్ షూటింగ్ హైదరాబాద్ లో ప్రారంభమైంది. ఈ షెడ్యూల్ లో పవన్ కల్యాణ్ జాయిన్ అయ్యారు.

అన్నపూర్ణ స్టుడియోస్ లో వేసిన ప్రత్యేకమైన కోర్టు సెట్ లో ఇవాళ్టి నుంచి పవన్ పై సన్నివేశాలు తీస్తున్నారు. దాదాపు 10 రోజుల పాటు ఈ షెడ్యూల్ నడుస్తుంది. దిల్ రాజు నిర్మిస్తున్న ఈ సినిమాకు వేణుశ్రీరామ్ దర్శకుడు. బోనీ కపూర్ సహ-నిర్మాత.

హిందీలో అమితాబ్ బచ్చన్, తమిళ వెర్షన్ లో అజిత్ పోషించిన పాత్రను తెలుగులో ఇప్పుడు పవన్ కల్యాణ్ పోషిస్తున్నాడు. తాప్సి పోషించిన పాత్రలో నివేత థామస్ కనిపించనుంది. మరో 2 కీలక పాత్రల్లో అనన్య, అంజలి కనిపించబోతున్నారు.

తమన్ ఈ సినిమాకు సంగీతం అందిస్తున్నాడు. ఈ ఏడాది సమ్మర్ తర్వాత సినిమాను విడుదల చేయడానికి ప్లాన్ చేస్తున్నారు.