అవసరాల ఇంట్లో మహేష్ సందడి

తన రెండో సినిమాతో మరోసారి హిట్ దర్శకుడిగా ప్రూవ్ చేసుకున్నాడు అవసరాల శ్రీనివాస్. జ్యో అచ్యుతానంద సినిమాతో మరో సైలెంట్ హిట్ అందుకున్నాడు. సినిమా చూసిన ప్రతి ఒక్కరు బాగుందని మెచ్చుకుంటున్నారు. ఇదిలా ఉండగా… అవసరాతో నిజంగానే మహేష్ బాబుకు అవసరం వచ్చింది. జ్యో అచ్యుతానంద సినిమా కోసం అవసరాల శ్రీనివాస్ ఉపయోగించిన సెట్ ను ఇప్పుడు మహేష్ బాబు కూడా కోరుకుంటున్నాడు. ఇదేదో సెంటిమెంట్ కోసం కాదు. తన సినిమాకు ఆ సెట్ సరిగ్గా సరిపోతుందనేది మహేష్ ఆలోచన.

కథ ప్రకారం ఈ షెడ్యూల్ షూటింగ్ అంతా ఒక మిడిల్ క్లాస్ ఇంట్లో జరగాల్సి ఉంది. అందుకోసం దర్శకుడు మురుగదాస్ 90వ దశకంలో ఇళ్లను పోలిన మిడిల్ క్లాస్ ఇంటిని సెట్ గా వేయాలనుకున్నాడు. ఇటీవలే జ్యో అచ్యుతానంద టీమ్ ఫిలింనగర్లో అటువంటి ఇంటినే రూపొందించి సినిమా చేసింది. ఆ సెట్ ను గమనించిన మురుగదాస్ ఆ ఇల్లు అయితే తమకు సరిగ్గా సరిపోతుందని భావించి దాన్ని వాడుకోవాలని భావిస్తున్నాడట. ఇదే విషయాన్ని వారాహి అధినేత సాయి కొర్రపాటితో చర్చించాడు. అన్నీ కుదిరితే ఆ ఇంట్లోనే మహేష్ షూటింగ్ జరిగే అవకాశం ఉంది.