శంకర్ ప్రయోగానికి 13 ఏళ్లు...

Tuesday,August 30,2016 - 02:25 by Z_CLU

వచ్చిన కొత్తలో బూతు సినిమా అన్నారు. డబ్బాలో రాళ్లు వేసి ఆడించినట్టు ఉందని రెహ్మాన్ మ్యూజిక్ ను కామెంట్ చేశారు. శంకర్ కు పిచ్చిపట్టిందని నవ్వుకున్నారు. అనవసరంగా డబ్బు వృధా చేశారని మరికొందరు గోలచేశారు. బాయ్స్ సినిమా విడుదలైన కొత్తలో ఇలా ఎన్నో విమర్శలు. కానీ శంకర్ నమ్మకం వృధా పోలేదు. ఎవర్ని టార్గెట్ చేశాడో వాళ్లే బ్రహ్మరథం పట్టారు. బాయ్స్ సినిమాకు సౌత్ లోని బాయ్స్ అంతా ఫిదా అయిపోయారు. సినిమాలో ప్రతి క్యారెక్టర్ లో తమనుతాము చూసుకున్నారు. దీంతో ఫ్లాప్ టాక్ తో ప్రారంభమైన బాయ్స్ సినిమా వారం తిరిగే సరికి బ్లాక్ బస్టర్ టాక్ తెచ్చుకుంది. ఆ సినిమా ఇప్పుడు 13 ఏళ్లు పూర్తిచేసుకుంది.

ఈ సినిమాతోనే హీరో సిద్దార్థ్ వెండితెరకు పరిచయం అయ్యాడు. అప్పటివరకు అసిస్టెంట్ డైరక్టర్ గా ఉన్న సిద్ధూ హీరో అయిపోయాడు. అంతేకాదు.. బొమ్మరిల్లులో హ..హ..హాసినిగా మెప్పించిన జెనీలియాకు కూడా సౌత్ లో ఫస్ట్ మూవీ ఇదే. ప్రస్తుతం టాలీవుడ్ ను తన కిర్రాక్ మ్యూజిక్ తో ఊపేస్తున్న తమన్ ఇందులో ఓ క్యారెక్టర్ చేశాడు. అంతేకాకుండా టైం-ఫ్రీజ్ టెక్నిక్ తో తెరకెక్కించిన మొదటి ఇండియన్ మూవీగా కూడా ఇది పేరుతెచ్చుకుంది. సినిమాటోగ్రాఫర్ రవి.కె.చంద్రన్ 62 కెమెరాలు ఉపయోగించి ఈ టెక్నాలజీ సహాయంతో ఓ పాటను తెరకెక్కించాడు. సినిమాలో అలె..అలె పాట మొత్తం ఈ టెక్నాలజీ మీదే నడిచింది. ఇలా బాయ్స్ సినిమాలో ఎన్నో హంగులున్నాయి.